பேசத் தகாத வார்த்தைகளால் பிரபலத்தை விரும்பும் ட்ரம்ப்! 

– ரோட்ரிகோ பிரைனோ (Rodrigo Praino)

வரம்பு மீறிய வன்முறை பேச்சுக்கள், அதிரடி சொற் பிரயோகங்கள், கேட்கவே காது கூசும் இழிமொழிகள்,  நினைத்துப் பார்க்கவே முடியாத  கொடூரமான சொல்லாடல்கள், தன்னை அச்சமற்ற  வீரராக  காட்டும் முனைப்பு .. போன்றவற்றின் வழி  அதிரடி செய்யும் அமெரிக்க அதிபர்  ட்ரம்ப்பின் நோக்கம் தான் என்ன? :

அமெரிக்க அதிபர் டொனால்ட் ட்ரம்ப், தனக்கு முந்தைய அதிபர்கள் பேசிய விதத்திலிருந்து முற்றிலும் மாறுபட்ட விதத்தில் பேசுகிறார். அவரது தனித்துவமான மற்றும் எளிதில் அடையாளம் காணக்கூடிய பாணி, அவரது அரசியல் ஆதரவுத் தளத்தைக் கவர்வதில் ஒரு முக்கியப் பங்கு வகிக்கக் கூடும்…என எண்ணுகிறேன்.

ஈரானுடனான போர் தொடங்கியதிலிருந்து, ட்ரம்பின் சொல்லாடல்கள் மேலும் ஆவேசம் மிக்கதாகவும், மூர்க்கத்தனமானதாகவும் மாறியுள்ளது. இது, இதே போன்ற சந்தர்ப்பங்களில் அவரது முன் இருந்த அதிபர்கள் பயன்படுத்திய மொழியிலிருந்து மிகப் பெரிய அளவில் வித்தியாசப்படுகிறது.

சமநிலையற்ற வசைப் பேச்சுக்களை சட்சடாரென்று அள்ளி வீசுகின்ற  ட்ரம்பின் சொல்லாட்சிப் பாணியை அரசியல் விற்பன்னர்களே அதிர்ச்சியுடன் அவதானிக்கின்றனர்.  தான் எதிர்ப்பவர்களை இழிவுபடுத்தும் மொழிகளில் தவறான ஒப்பீடுகள்  செய்வதும், புறக்கணிப்பதும் அவருக்கு கைவந்த கலையாகும். ..!

சமீபத்திய ஆய்வு ஒன்றில் இன்னும் மூர்க்கத்தனத்துடன் ட்ரம்ப் வன்முறை மிகுந்த சொற்களை – குறிப்பாகப் போர் மற்றும் குற்றத்துடன் தொடர்புடைய சொல்லாடலைப் – பயன்படுத்துவது, அமெரிக்காவின் நாகரீகமான அரசியல் மரபிலிருந்து முற்றிலும் வேறான வகையில் அவர் விலகிச் சென்றவராகவே கருத முடிகிறது என வருத்தப்படுகின்றனர், அமெரிக்க மக்கள்!

அசிங்கத்திற்கு புகழ்பெற்ற ‘ஆக்சஸ் ஹாலிவுட்’ ஒலிநாடாக்கள் வெளியானதிலிருந்து, தனக்கு முந்தைய அதிபர்கள் யாரும் பொது வெளியில் சொல்லக் கனவிலும் நினைத்திராத விஷயங்களை  ட்ரம்ப் சர்வ சாதாரணமாக சொல்லிக் கடக்கிறார்.  அன்று 1970-களில் ரிச்சர்ட் நிக்சன் ஓவல் அலுவலகத்தில்  பேசத் தகாத வார்த்தைகளைப் பயன்படுத்தினார் என்பதை அறிந்து  பேரதிர்ச்சியடைந்த  இதே அமெரிக்காவில்,  இப்படியான வகையில் ஒரு தலைவர் இன்றைய தினம் பேச முடிவதை என்னென்பது?

எதிரிகளை இழிவுபடுத்துதல்;

 ஈரானின் உச்ச தலைவர் அயதுல்லா அலி கொமேனியின் மரணத்தை ட்ரம்ப், அவரை “ஒரு பரிதாபகரமான மற்றும் கீழ்த்தரமான மனிதர்” என்று  விவரித்து அறிவித்தார். பின்னர், ட்ரூத்  சமூகவலை தளப் பதிவில், அவரை “வரலாற்றிலேயே மிகவும் தீய மனிதர்களில் ஒருவர்” என்று அழைத்ததோடு, அவரது தளபதிகளை இரத்த வெறி கொண்ட குண்டர்கள் கும்பலாகச் சித்தரித்தார்.

சில நாட்களுக்குப் பிறகு, அவர் ஈரானிய ஆட்சியின் தலைவர்களைத் தொடர்ந்து இழிவுபடுத்தினார்; அவர்களை “மனநிலை பிறழ்ந்த அயோக்கியர்கள்” என்றும், அவர்களைக் கொல்வது தனக்கு ஒரு பெரும் கௌரவத்தைத் தருவதாகவும் வர்ணித்தார். மேலும், தனது தந்தைக்குப் பிறகு ஈரானின் உச்சத் தலைவராகப் பொறுப்பேற்ற மொஜ்தபா கொமெனியையும் அவர் அவமதித்து, அவரை “ஏற்றுக் கொள்ள முடியாதவர்” மற்றும் “திறமையற்றவர்” என்றும் வசைபாடினார்.

ஒரு நேர்காணலின் போது, ​​மொஜ்தபா உயிருடன் இருக்கிறார், ஆனால் “பாதிக்கப்பட்டுள்ளார்” என்று தாம் நம்புவதாக  ட்ரம்ப் கூறினார்.

அமெரிக்க அதிபர்கள் தங்கள் எதிரிகளை வர்ணிக்க கடுமையான வார்த்தைகளைப் பயன்படுத்துவது அவர்களுக்குப் புதிதல்ல. ரொனால்ட் ரீகன் சோவியத் யூனியனை அதிகபட்சமாக ஒரு “தீய பேரரசு” என்றது அன்று  பெரும் பேசுபடு பொருளானது.

ஜோர்ஜ் டபிள்யூ. புஷ், அமெரிக்கப் படைகள் “சதாம் உசேனை உயிருடன் பிடித்தன” என்று எளிமையாகக் கூறினார். பராக் ஒபாமா, அமெரிக்க மண்ணில் நடந்த மிக மோசமான பயங்கரவாதத் தாக்குதலின் சூத்திரதாரியான ஒசாமா பின்லேடனை, “ஒசாமா பின்லேடன், அல்-கொய்தாவின் தலைவர், மற்றும் ஒரு பயங்கரவாதி” என்று எளிமையாக விளித்து, அவரது கொலையை நாட்டுக்கு அறிவித்தார்.

தொடர்ச்சியான அச்சுறுத்தல்கள் அச்சுறுத்தல் தரும் எச்சரிக்கைகள் விடுப்பதில் கூட ட்ரம்ப் சிறிதும் நிதானத்தைக் கடைப்பிடிக்கவில்லை. ஈரான் மோதலின் தொடக்கத்தில், ஒரு நேர்காணலில், அவர்கள் ஈரானைக் கடுமையாகத் தாக்க இன்னும் தொடங்கவே இல்லை என்றும், “பெரும் அலை” விரைவில் வரவிருக்கிறது என்றும் அவர் கூறினார். பின்னர், அவர் ‘ட்ரூத் சோஷியல்’ தளத்தில், ஈரானை “இருபது மடங்கு கடுமையாக” தாக்கத் தயாராக இருப்பதாகப் பதிவிட்டார். மேலும், “ஈரான் ஒரு தேசமாக மீண்டும் கட்டியெழுப்பப்படுவதை கிட்டத்தட்ட சாத்தியமற்றதாக்கி விடுவேன்” என்றும், “மரணம், நெருப்பு மற்றும் சீற்றம் அவர்கள் மீது ஆட்சி செய்யும்” என்றும் அச்சுறுத்தினார்.

ஒரு கட்டத்தில், “சும்மா ஒரு வேடிக்கைக்காக” ஈரானின் கார்க் தீவு எண்ணெய் ஏற்றுமதி மையத்தை மீண்டும் தாக்கக்கூடும் என்றும் அவர் குறிப்பிட்டார். இந்த மொழி வெறுமனே வன்மம் நிறைந்தது மட்டுமல்ல. இது, படைபலத்தைப் பயன்படுத்துவதில் நிதானத்தைக் கடைப்பிடிக்க வேண்டும் என்றும், இராணுவ மோதல்களைத் தணிக்க விருப்பம் காட்ட வேண்டும் என்றும் அடிக்கடி வலியுறுத்திய முந்தைய அமெரிக்க ஜனாதிபதிகளின் சொல்லாடல்களுக்கு முற்றிலும் முரணாகவும் உள்ளது. முந்தைய ஜனாதிபதிகள் அமெரிக்க இராணுவத்தின் வலிமை குறித்து மிகவும் தெளிவாகக் கூறியிருந்தாலும், அவர்கள் ராஜதந்திரம் மற்றும் பேச்சுவார்த்தைகளிலும் கவனம் செலுத்த முயன்றனர்.

சிரியாவைப் பற்றிப் பேசும் போது, ​​ஒபாமா, “அமெரிக்க இராணுவம் சிறுசிறு தாக்குதல்களை நடத்துவதில்லை” என்று பிரபலமாகக் குறிப்பிட்டார். ஆயினும், சில கணங்களுக்குப் பிறகு, அவரது நிர்வாகம் ராஜதந்திர வழிகளைப் பின்பற்றும் அதே வேளையில், படைபலத்தைப் பயன்படுத்த அங்கீகாரம் அளிக்கும் வாக்கெடுப்பை ஒத்திவைக்குமாறு காங்கிரஸைக் கேட்டுக் கொண்டார்.

வியட்நாம் போரின் போது நிக்சன் இவ்வாறு கூறினார்: “நாம் வெல்ல விரும்பும் அமைதி என்பது வேறு எந்த மக்கள் மீதும் பெறும் வெற்றி அல்ல; மாறாக, ‘தன் சிறகுகளில் குணமளித்தலுடன்’ வரும் அமைதி; துன்புற்றவர்கள் மீது இரக்கத்துடன்; நம்மை எதிர்த்தவர்கள் மீது புரிதலுடன்; இந்தப் பூமியில் உள்ள அனைத்து மக்களும் தங்கள் தலைவிதியைத் தாங்களே தேர்ந்தெடுத்துக் கொள்ளும் வாய்ப்புடன் வரும் அமைதி” என்றார்.

பதற்றத்தை அதிகரிப்பது குறித்த ட்ரம்பின் அச்சுறுத்தல்கள், பொதுமக்களின் பாதுகாப்பு மற்றும் முக்கிய உள்கட்டமைப்புகளின் பாதுகாப்பு குறித்தும் கவலைகளை எழுப்புகின்றன.  இருப்பினும், முந்தைய ஜனாதிபதிகள் இராணுவ இலக்குகளுக்கும் பொதுமக்களுக்கும் இடையே வெளிப்படையாக வேறுபடுத்திக் காட்டினர்.

வளைகுடாப் போரின் போது, ​​ஜோர்ஜ் எச். டபிள்யூ. புஷ், “எங்கள் சண்டை ஈராக் மக்களுடன் அல்ல. அவர்கள் துன்பப்படுவதை நாங்கள் விரும்பவில்லை” என்று அறிவித்தார். 2003-ல், ஜார்ஜ் டபிள்யூ. புஷ் ஈராக்கிய இராணுவ மற்றும் பொதுமக்களை எச்சரித்தார்: “ஈராக் மக்களுக்குச் சொந்தமான செல்வத்தின் ஆதாரமான எண்ணெய் கிணறுகளை அழிக்காதீர்கள். ஈராக் மக்கள் உட்பட யாருக்கும் எதிராகப் பேரழிவு ஆயுதங்களைப் பயன்படுத்த வேண்டும் என்ற எந்தக் கட்டளைக்கும் கீழ்ப்படியாதீர்கள்”. வார்த்தைகளுக்கு முக்கியத்துவம் உண்டு டிரம்பின் சொல்லாடல் ஏன் இவ்வளவு வன்முறையாகவும், அவருக்கு முந்தைய ஏறக்குறைய அனைத்து அமெரிக்க ஜனாதிபதிகளின் மொழியிலிருந்தும் மிகவும் மாறுபட்டதாகவும் இருக்கிறது என்பது இன்னும் கூட நிறைய சொல்ல முடியும்.

2020 ஆம் ஆண்டு ஆய்வு ஒன்றின்படி, ட்ரம்பின் வெளியுறவுக் கொள்கை சொல்லாடல்கள் பெரும்பாலும் தனது உள்நாட்டு ஆதரவுத் தளத்தைத் திரட்டுவதற்கான நோக்கம் கொண்டது. நாட்டில் ஒரு நெருக்கடி உணர்வை உருவாக்குவதையோ அல்லது உள்நாட்டின் அரசியல் சிக்கல்களிலிருந்து கவனத்தைத் திசை திருப்புவதையோ நோக்கமாகக் கொண்டுள்ளன என்று கண்டறியப்பட்டது. சில பார்வையாளர்கள், அவசரகாலப் பிரகடனங்கள் மூலம் தனது நிர்வாக அதிகாரத்தை விரிவுபடுத்துவதற்கான ஒரு வழிமுறையாக, டிரம்ப் தேசிய நெருக்கடிகளைப் பயன்படுத்தியுள்ளார் என்று வாதிடுகின்றனர்.

ஈரானுடனான தற்போதைய போரில் ‘இது தான் நிலைமையா?’ என்பதைப் பொறுத்திருந்து தான் பார்க்க வேண்டும். ஆனால், வார்த்தைகளுக்கு நிச்சயமாக முக்கியத்துவம் உண்டு. 1945 டிசம்பர் 19 அன்று, அமெரிக்க ஜனாதிபதி ஹாரி எஸ். ட்ரூமன், போர் துறையையும், கடற்படை துறையையும் ஒரே “தேசிய பாதுகாப்புத் துறை”யாக இணைக்கப் பரிந்துரைத்து, காங்கிரசுக்கு ஒரு சிறப்புச் செய்தியை அனுப்பினார்.

1947 மற்றும் 1949-க்கு இடையில், காங்கிரசும், நிர்வாகத் துறையும் இந்த முன்மொழிவைச் செயல்படுத்தின. போருக்குப் பிந்தைய காலத்தில், பல நாடுகள் இதேபோன்ற ஒரு செயல்முறையைக் கையாண்டன; தங்கள் துறைகள் மற்றும் அமைச்சகங்களின் பெயர்களில் இருந்த “போர்” என்ற வார்த்தையை, மிகவும் அடக்கமான “பாதுகாப்பு” என்ற சொல்லால் மாற்றின.

எழுபத்தாறு ஆண்டுகளுக்குப் பிறகு, 2025-ல், ட்ரம்ப் ஒரு நிர்வாக ஆணை மூலம் அந்த மரபைத் தலைகீழாக்கி, பாதுகாப்புத் துறைக்கு அமெரிக்கப் போர் துறை எனப் பெயர் மாற்றினார். இந்த நிர்வாக ஆணையில் வெளிப்படும் புதிய பெயர் எந்த நேரத்திலும் போரிடுவதற்கான விருப்பத்தை வெளிப்படுத்துகிறது என்று தெளிவாகக் கூறுகிறது.

-ரோட்ரிகோ பிரைனோ
பேராசிரியர் மற்றும் இயக்குனர்,
ஜனநாயகம் மற்றும் சிக்கலான தொழில்நுட்பங்களுக்கான மையம்,
ஃபிளிண்டர்ஸ் பல்கலைக்கழகம்,
அமெரிக்கா

மூலம்: Trump’s war language is aggressive and extreme. It also offers some insight into his thinking