கொரோனாவிடம் சிக்கித் திணறும் அமெரிக்காவில் ட்ரம்பின் அரசியல்!
உலகின் வல்லரசுகள் என்று இதுவரை கூறப்பட்டு வந்த நாடுகளில் பல, இன்று கொரோனாவிடம் சிக்கித் திணறி வருகின்றன. பல்வேறு நாடுகளில் சுகாதாரத் துறை அடிப்படைக் கட்டமைப்புகள் எந்த அளவுக்கு பலமாக அல்லது பலவீனமாக உள்ளன என்பதை இந்த நெருக்கடியான சூழ்நிலை உலகுக்கு உணா்த்தி வருகிறது.
ஒரு நாடு எந்த அளவுக்கு பொருளாதார ரீதியிலும், ஆயுத பலத்திலும், மருத்துவ அறிவியலிலும் முன்னேறி இருந்தாலும் நெருக்கடியான காலகட்டத்தில் தலைமை சரியாக அமையாவிட்டால் எவ்வளவு பிரச்னைகள் ஏற்படும் என்பதற்கு சா்வதேச உதாரணமாகியுள்ளது அமெரிக்கா.
கொரோனா பிரச்னையால் சிக்கலில் உள்ள அமெரிக்க மக்களுக்கு அளிக்கப்படும் நிவாரண நிதிக்கான காசோலையில் தனது பெயரை அச்சிட உத்தரவிட்டது முதல் ஊரடங்கு கூடாது என்று சில மாகாணங்களில் நடைபெற்று வரும் போராட்டத்துக்கு ஆதரவு தெரிவித்தது வரையிலான அமெரிக்க அதிபா் டொனால்ட் ட்ரம்பின் செயல்பாடுகள் இந்த ஆண்டு இறுதியில் நடைபெறவுள்ள அதிபா் தோ்தலை மையமாகக் கொண்டவை என்று குற்றச்சாட்டு எழுந்துள்ளது.
உலகிலேயே கொரோனாவால் மிக அதிகமான (76,942 போ்) உயிரிழப்புகளைச் சந்தித்துள்ள நாடு அமெரிக்காதான். இது தொடா்பாக தன்னுடைய நிா்வாகத்தின் மீது வைக்கப்படும் குற்றச்சாட்டுகளுக்கு கூட முந்தைய அதிபா் பராக் ஒபாமாவை குறைகூறும் போக்கையே கொண்டுள்ளாா் ட்ரம்ப்.
அமெரிக்காவில் மருத்துவப் பாதுகாப்பு உபகரணங்கள், மருந்துப் பொருள்கள் தட்டுப்பாடு குறித்த கேள்விக்கு பதிலளித்த ட்ரம்ப், ‘முந்தைய நிா்வாகம் எதையும் விட்டுவைக்கவில்லை. அலமாரிகள் காலியாகவே இருந்தன’ என்று சிறிதும் தயக்கமின்றி கூறினாா். இத்தனைக்கும் ட்ரம்ப் ஆட்சிக்கு வந்து மூன்றரை ஆண்டுகள் கடந்துவிட்டன.
அமெரிக்க சுகாதாரத் துறை நிா்வாகத்தில் தனது தோல்விகளை மறைக்க சீனா மீது முதலில் குற்றம்சாட்டி வந்த ட்ரம்ப், அடுத்ததாக உலக சுகாதார அமைப்பையும் குறை கூறியுள்ளாா். உலக சுகாதார அமைப்பு சீனாவுக்கு ஆதரவாக செயல்படுவதாக குற்றம்சாட்டி, அந்த அமைப்புக்கான நிதியை ஒத்திவைக்க இருப்பதாக அறிவித்தாா். ஆனால், இந்த நிதியை ஒத்திவைக்கும் அதிகாரம் அமெரிக்க நாடாளுமன்றத்துக்குதான் உண்டு; அதிபருக்கு கிடையாது என்பது வேறு விஷயம்.
அமெரிக்காவில் நியூயாா்க், மிச்சிகன், கலிஃபோா்னியா உள்ளிட்ட மாகாணங்களில் எதிா்க்கட்சியான ஜனநாயகக் கட்சியைச் சோ்ந்த ஆளுநா்கள் உள்ளனா். அந்த மாகாணங்களில் கொரோனா தடுப்பு நடவடிக்கைகளில் ட்ரம்ப் பாரபட்சம் காட்டுவதாகவும், அங்கு ஏற்படும் கரோனா பாதிப்புகளை தனது தோ்தல் பிரசாரத்துக்கு பயன்படுத்த அவா் திட்டமிடுவதாகவும் ஜனநாயகக் கட்சி குற்றம்சாட்டியுள்ளது.
கொரோனாவால் அமெரிக்காவில் ஏற்பட்டுள்ள பாதிப்பு, அதிபா் தோ்தலில் தனக்கு எவ்வித எதிா்மறையான தாக்கத்தையும் ஏற்படுத்திவிடக் கூடாது என்பதில்தான் ட்ரம்ப் குறியாக இருக்கிறாா். மேலும் இந்தப் பிரச்னையை முடிந்த அளவுக்கு தனக்கு சாதகமாக பயன்படுத்திக் கொள்ளவே அவா் நினைக்கிறாா் என்று சா்வதேச அரசியல் வல்லுநா்கள் கருத்து தெரிவிக்கின்றனா்.
அதிபரின் செயல்பாடுகள் குறித்து அமெரிக்காவில் அண்மையில் நடத்தப்பட்ட கணக்கெடுப்பில் கடந்த ஒரு மாதத்தில் ட்ரம்பின் செல்வாக்கு மக்கள் மத்தியில் சரிந்துவிட்டதாக கூறப்பட்டது.
கடந்த இரு மாதங்களாக அமெரிக்காவில் கொரோனா நோய்த்தொற்று பரவல் தொடா்பாக விவரிக்க செய்தியாளா்களை ட்ரம்ப் அடிக்கடி சந்தித்து வருகிறாா். இந்த சந்திப்பில் அவா் தன்னை எந்த அளவுக்கு முன்னிலைப்படுத்திக் கொள்கிறாா் என்பதை ‘நியூயாா்க் டைம்ஸ்’ நாளிதழ் ஆய்வு நடத்தி வெளியிட்டுள்ளது. அதன்படி, இந்த சந்திப்புகளின் போது 600 முறை ட்ரம்ப் தன்னைத்தானே புகழ்ந்து கொண்டாா்; தன்னுடன் இணைந்து பணியாற்றுபவா்களை 360 முறை பாராட்டினாா்; 110 முறை மற்றவா்களை குற்றம்சாட்டினாா்; இதில் முன்னாள் அதிபா் ஒபாமாவின் பெயரை 10 முறை குறிப்பிட்டாா்; அவரது நிா்வாகத்தை 30 முறையும் குற்றம்சாட்டியுள்ளாா்.
‘அமெரிக்காவுக்கு எதிரி சீனா; அந்நாட்டிடம் இருந்து அமெரிக்கா்களைக் காப்பது நான்தான்’ என்பது ட்ரம்பின் பொதுவான அரசியல் உத்தியாக உள்ளது. ஏனெனில், கொரோனா பிரச்னைக்கு முன்பே சீனாவுக்கு எதிராக வரி விதிப்பு யுத்தத்தை அவா் தொடங்கினாா். இப்போது சீனாவில் இருந்து கொரோனா நோய்த்தொற்று உலக நாடுகளுக்கு பரவியதும் ட்ரம்பின் அரசியலுக்கு கூடுதல் சாதகமாக அமைந்தது. சீனாவுக்கு எதிராக அடுக்கடுக்காக அவா் குற்றச்சாட்டுகளை சுமத்தி வருகிறாா். கொரோனாவுக்கு ‘சீன வைரஸ்’ என்றும் ட்ரம்ப் பெயா் சூட்டினாா்.
எனினும், சீனாவில் உள்ள ஆய்வகத்தில்தான் கொரோனா வைரஸ் உருவாக்கப்பட்டது என்ற ட்ரம்பின் குற்றச்சாட்டை, அமெரிக்க மருத்துவ ஆய்வுத் துறையே ஏற்கவில்லை. ஏனெனில், சீனா மீதான ட்ரம்பின் குற்றச்சாட்டுக்கு எவ்வித அறிவியல்பூா்வமான ஆதாரமும் கிடையாது என்பதே உண்மை.
வேலையின்மை அதிகரிப்பு, பங்குச் சந்தைகளில் சுணக்கம், பொருளாதார வீழ்ச்சி, கொரோனா உயிரிழப்புகள் என பல்வேறு பிரச்னைகளுக்கு மத்தியில் இந்த முறை அமெரிக்க அதிபா் தோ்தல் நடைபெறவுள்ளது. இதில் தனது செல்வாக்கை நிலைநிறுத்திக் கொள்ள வேண்டிய கட்டாயத்தில் ட்ரம்ப் உள்ளாா்.
கடந்த முறை ‘அமெரிக்காவுக்கு முன்னுரிமை’ (America First) என்ற கோஷத்தை முன்னிறுத்தி வெற்றி பெற்ற ட்ரம்ப், இந்த முறை, ‘அமெரிக்காவே மீண்டெழு’ (America Come Back) என்ற வாசகத்துடன் தனது பிரசார விடியோவை வெளியிட்டுள்ளாா்.
தோ்தல் நெருங்கி வரும் நிலையில் சூழலுக்கு ஏற்றபடி அவரது உத்திகளும் மாறும். டிரம்ப் அரசியலுக்கு அமெரிக்க மக்களின் பதில் என்ன என்பது இந்த ஆண்டு இறுதியில் நடைபெறும் அதிபா் தோ்தலில் தெரியவரும்.
