அமெரிக்காவின் 15 அம்ச அமைதி திட்டம் தர்க்கமற்றது என ஈரான் நிராகரிப்பு

அமைதிக்கான அமெரிக்காவின் 15 அம்ச திட்டம் என்பது அளவுக்கு மீறிய விருப்பத்தைக் கொண்டதும், தர்க்கமற்றதுமாகும் என கூறி அதனை ஈரான் நிராகரித்துள்ளது.

ஈரானுக்கு எதிரான போரை முடிவுக்குக் கொண்டு வரும் நோக்கில் அமெரிக்க அதிபர் டொனால்ட் ட்ரம்ப் 15 அம்ச அமைதி திட்டம் ஒன்றை கடந்த மார்ச் 26 ஆம் திகதி வெளியிட்டார்.

ஈரான் அணு ஆயுதத்துக்கு முடிவு கட்ட வேண்டும், யுரேனியம் செறிவூட்டுவதை நிறுத்த வேண்டும், ஹார்முஸ் ஜலசந்தி திறந்திருப்பதை உறுதி செய்ய வேண்டும், இருப்பில் உள்ள யுரேனியத்தை சர்வதேச அணுசக்தி முகமையிடம் (ஐ.ஏ.இ.ஏ) ஒப்படைக்க வேண்டும், ஈரானின் நடான்ஸ், இஸ்ஃபஹன் மற்றும் ஃபோர்டோ ஆகிய பகுதிகளில் உள்ள அணு ஆயுத உற்பத்தி மையங்களை மூடி, ஐ.ஏ.இ.ஏ ஆய்வுக்கு உட்படுத்த வேண்டும், அண்டை நாடுகளில் உள்ள தீவிரவாத குழுக்களுக்கு ஆதரவளிப்பதை நிறுத்த வேண்டும், ஏவுகணைகளின் எண்ணிக்கை மற்றும் இலக்கு தூரங்களுக்கு வரம்பு நிர்ணயிக்க வேண்டும், எதிர்காலத்தில் தற்காப்புக்கு மட்டுமே ஏவுகணைகளைப் பயன்படுத்த வேண்டும், ஒப்பந்தம் பற்றி பேச ஒரு மாத காலத்துக்கு போர் நிறுத்தம் அறிவிக்க வேண்டும் என்பது உள்பட 15 நிபந்தனைகளை ட்ரம்ப் விதித்திருந்தார்.

இதன் தொடர்ச்சியாக, ஹார்முஸ் ஜலசந்தியை திறப்பது தொடர்பாக 48 மணி நேரத்துக்குள் ஈரான், அமெரிக்காவுடன் ஒப்பந்தம் ஏற்படுத்த வேண்டும் என்றும் இல்லாவிட்டால், ஈரான் நரகமாக மாறும் என்றும் எச்சரித்திருந்தார்.

எனினும், ட்ரம்ப்பின் இந்த எச்சரிக்கையை பொருட்படுத்தாமல், மேற்கு ஆசியாவில் உள்ள அமெரிக்க இலக்குகள் மீது ஈரான் தனது தாக்குதலை தீவிரப்படுத்தியுள்ளது. இஸ்ரேல், குவைத் மற்றும் ஐக்கிய அரபு இராச்சியம் மீது இன்று (ஏப்ரல் 6) அதிகாலையில் இருந்தே தொடர்ச்சியான ஏவுகணை மற்றும் ட்ரோன் தாக்குதல்களை ஈரான் நடத்தியது.

இந்நிலையில், அமெரிக்காவின் 15 அம்ச திட்டம் குறித்து ஈரானிய வெளியுறவு அமைச்சகத்தின் செய்தித் தொடர்பாளர் இஸ்மாயில் பாகாயி, ‘‘அமெரிக்காவின் சமாதானப் பேச்சுவார்த்தை திட்டம் அளவுக்கு மீறிய விருப்பத்தைக் கொண்டுள்ளது; தர்க்கமற்றதாக உள்ளது. அச்சுறுத்தல்களின் கீழ் பேச்சுவார்த்தைகள் நடைபெற முடியாது.

ஈரான் உள்கட்டமைப்புகளைத் தாக்குவோம் எனும் அமெரிக்காவின் அச்சுறுத்தல்கள் போர்க்குற்றங்களுக்கு ஒப்பானவை. நாட்டை காப்பதில் ஈரான் தொடர்ந்து கவனம் செலுத்தி வருகிறது. அதற்கான இராணுவ முயற்சிகளோடு ராஜதந்திரமும் தொடர்கிறது’’ என தெரிவித்துள்ளதாக ஈரான் இன்டர்நேஷ்னல் தெரிவித்துள்ளது.

இதனிடையே, இரு தரப்புக்கும் இடையே சமாதானத்தை ஏற்படுத்துவதற்கான முயற்சியை மேற்கொண்டுள்ள பாகிஸ்தான், இது தொடர்பான ஒரு திட்டத்தை இரு தரப்புக்கும் அளித்துள்ளது. இது தொடர்பாக ராய்ட்டர்ஸ் செய்தி நிறுவனம் வெளியிட்டுள்ள செய்தியில், ‘இந்த திட்டத்தின்படி, போர் நிறுத்தம் உடனடியாக அமுலுக்கு வரும். ஹார்முஸ் ஜலசந்தி உடனடியாக திறக்கப்படும். பரந்த ஒரு தீர்வை இறுதி செய்ய 15-20 நாட்கள் அவகாசம் வழங்கப்படும் என்று தெரிவிக்கப்பட்டுள்ளது. எனினும், இந்த திட்டம் குறித்து அமெரிக்கா மற்றும் ஈரான் தரப்பில் இருந்து உடனடியாக எந்த பதிலும் வரவில்லை’ என கூறப்படுகிறது.

நேற்று ஏப்ரல் 5, ஞாயிற்றுக்கிழமை அதிகாலை, ஈரான் இராணுவம் இஸ்ரேல் மற்றும் குவைத் ஆகிய நாடுகளின் மீது நூற்றுக்கணக்கான ட்ரோன்கள் மற்றும் ஏவுகணைகளை ஏவி பெரும் தாக்குதலை நடத்தியுள்ளது (Iran Retaliatory Strikes). அமெரிக்க அதிபர் டொனால்ட் ட்ரம்பின் 48 மணி நேரக் கெடு முடிவடைய உள்ள நிலையில், இந்தத் தாக்குதல் மத்திய கிழக்கு நாடுகளில் பெரும் பதற்றத்தை உருவாக்கியுள்ளது.

குவைத்தின் எரிசக்தி மையங்கள் மீது தாக்குதல்

குவைத்தில் உள்ள முக்கிய எண்ணெய் மற்றும் மின்சாரக் கட்டமைப்புகளைக் குறிவைத்து ஈரான் தாக்குதல் நடத்தியுள்ளது.

• எண்ணெய் வளாகத்தில் தீ: குவைத்தின் ‘சுவைக்’ (Shuwaikh) எண்ணெய் துறை வளாகத்தில் ஈரானின் ட்ரோன் மோதியதில் பெரும் தீ விபத்து ஏற்பட்டுள்ளது.
• மின்சாரம் மற்றும் குடிநீர் பாதிப்பு: அங்குள்ள இரண்டு மின் உற்பத்தி நிலையங்கள் மற்றும் கடல்நீரை குடிநீராக்கும் ஆலைகள் (Desalination plants) கடுமையாக சேதமடைந்துள்ளன. இதனால் இரண்டு மின் அலகுகள் செயல்பாட்டை இழந்துள்ளதாக குவைத் மின்சார அமைச்சகம் அறிவித்துள்ளது.

இஸ்ரேலில் ஏவுகணைத் தாக்குதல்கள்

மறுபுறம், இஸ்ரேலின் டெல் அவிவ் (Tel Aviv) மற்றும் தெற்குப் பகுதியான ஆராத் (Arad) ஆகிய இடங்களிலும் ஈரானின் ‘காதிர்’ (Qadr) வகை ஏவுகணைகள் விழுந்துள்ளன.

• குடியிருப்புகள் சேதம்: ஆராத் நகரில் உள்ள குடியிருப்பு கட்டிடங்கள் மீது ஏவுகணைகள் விழுந்ததில் பலர் காயமடைந்துள்ளதாகவும், கட்டிடங்கள் பலத்த சேதமடைந்துள்ளதாகவும் தகவல்கள் தெரிவிக்கின்றன.
• விமானப் பாதுகாப்பு: இஸ்ரேலின் வான் பாதுகாப்பு அமைப்புகள் பல ஏவுகணைகளை இடைமறித்து அழித்தாலும், சில ஏவுகணைகள் நிலத்தில் விழுந்து பாதிப்பை ஏற்படுத்தியுள்ளன.

“நரகத்தின் கதவுகள் திறக்கும்” – ஈரான் எச்சரிக்கை

அதிபர் ட்ரம்பின் 48 மணி நேர இறுதி எச்சரிக்கையை ஈரான் இராணுவம் அடியோடு நிராகரித்துள்ளது. ஈரானின் மத்திய இராணுவ கமாண்டர் ஜெனரல் அலி அப்துல்லாஹி இது குறித்துக் கூறுகையில்:

“ட்ரம்ப் விடுத்துள்ள கெடு ஒரு முட்டாள்தனமான செயல். அமெரிக்காவும் இஸ்ரேலும் எங்கள் மீதான தாக்குதலை நிறுத்தவில்லை என்றால், உங்களுக்காக நரகத்தின் கதவுகள் திறக்கப்படும்,” என்று எச்சரித்துள்ளார்.

மேலும், ஈரானின் அணுமின் நிலையங்கள் மீது தாக்குதல் நடத்தப்பட்டால், அது அந்தப் பகுதி முழுவதையும் கதிரியக்கப் பாதிப்புக்கு உள்ளாக்கும் என்றும் ஈரான் எச்சரித்துள்ளது.

ட்ரம்பின் கெடுவும் அடுத்தகட்ட நடவடிக்கையும்

அமெரிக்க அதிபர் ட்ரம்ப் விதித்த 48 மணி நேர காலக்கெடு இன்று (ஏப்ரல் 6, திங்கட்கிழமை) இரவுடன் முடிவடைகிறது. ஒருவேளை ஈரான் பேச்சுவார்த்தைக்கு வராவிட்டால், ஈரானின் அனைத்து எரிசக்தி மையங்களையும் அழிக்கத் தயார் நிலையில் இருப்பதாக அமெரிக்காவும் இஸ்ரேலும் தெரிவித்துள்ளன. இதனால் மத்திய கிழக்கு பகுதியில் எப்போது வேண்டுமானாலும் ஒரு முழு அளவிலான போர் மூளும் சூழல் நிலவுகிறது.